Ka shkuar në 8 numri i mjekëve të prekur nga COVID-19 në vendin tonë, pasi një tjetër mjek është infektuar.
Sipas News 24, bëhet fjalë për një mjek reanimator, i cili i është nënshtruar testit për Coronavirus, prej ku ka rezultuar pozitiv.
Ende nuk dihet gjendja e tij apo rrethanat se si mund të jetë infektuar, por pritet një reagimi nga autoritetet.
Po ashtu, gazetarët që gjenden në terren bëjnë me dije se gjatë orëve të fundit në Spitalin Infektivit të QSUT kanë mbërritur gjashtë ambulanca, të cilat kanë sjellë pacientë.
Rrjedhimisht, mendohet se në orët në vijim numri i të prekurve me Coronavirus mund të rritet.
Në rang botëror deri tani janë shënuar 6,687 viktima dhe janë regjistruar 174,940 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
