Më herët ditën e sotme u lajmërua se Agim Seranaj është shkarkuar nga detyra e tij si zv/dekan i fakultetit të Inxhinierisë së Ndërtimit.
Vendimi është marrë nga dekani Neritan Shkodrani.
Pas ish-kryeministrit, Sali Berisha, mbi këtë vendim ka reaguar edhe ish-deputetja e Partisë Demokratike, Albana Vokshi.
Nëpërmjet një statusi në Facebook, Vokshi shprehet se Agim Seranaj, është shkarkuar sot me urdhër politik të Edi Ramës.
Sipas Vokshit, Seranaj ka folur publikisht për situatën aktuale të ndërtesave, duke evidentuar në mënyrë profesionale keqmenaxhimin nga ana e institucioneve të situatës pas tërmetit.
Postimi i plotë i Albana Vokshit:
Shkarkimi i zv. Dekanit të Inxhinierisë, reagon Albana Vokshi: Prof. Agron Seranaj u shkarkua se tha të vërtetat e tërmetit.Zv.dekani i Fakultetit të Inxhinierisë së Ndërtimit, z. Agim Seranaj, është shkarkuar sot me urdhër politik të Edi Ramës.
Profesor Seranaj, një nga profesionistët dhe ekspertër më të mirë në vend, për shkak të eksperiencës së tij në këtë fushë, ka qenë pjesë e ekipeve shtetërore të vlerësimit, për të bere ekspertim të cerdheve dhe kopshteve apo institucioneve të tjera.
Ndryshe nga drejtuesit militantë apo ekspertët servilë, Prof Seranaj, ka folur publikisht për situatën aktuale të ndërtesave duke evidentuar në mënyrë profesionale keqmenaxhimin nga ana e institucioneve të situatës pas tërmetit dhe duke mbrojtur interesin publik.
Rama ka vendosur të censurojë jo vetëm mediat, me anë të paketës që sapo kaloi në parlament, por edhe cdo zë kritik që nxjerr zbuluar përgjegjësinë direkte të tij në numrin e madh të viktimave por edhe të ndërtesave e pallateve të shembura nga tërmetet. Tashmë ka vendosur të hakmerret edhe ndaj ekspertëve më të njohur duke urdhëruar shkarkimin e tyre nga detyra për shkak se i kanë prishur propagandën që kishte përgatitur.
Dënon me forcë veprimin e paligjshëm dhe prej ushtari politik të Dekanit të Fakultetit të Inxhinierisë së Ndërtimit Neritan Shkodrani, i cili pa dinjitet dhe integritet profesional, i është nënshtruar urdhërit politik të Edi Ramës, duke cënuar rëndë autonominë universitare.
Në emër të Partisë Demokratike i bëj thirrje trupës së pedagogëve dhe studentëve të Fakultetit të Inxhinierisë së Ndërtimit të reagojnë për këtë ndërhyrje flagrante në autonominë universitare dhe për veprimin prej ushtari politik të Dekanit të Fakultetit!
#AutonomiUniversitare.
Lajmin e shkarkimit të Seranajt e ka bërë të ditur ish-kryeministri Sali Berisha i cili ka publikuar në Facebook dhe dokumentin të firmosur nga dekani Neritan Shkodrani.
Sipas denoncuesit që i ka dërguar dokumentin ai është shkarkuar për shkak se shkoi në zonat e prekura nga tërmeti në Durrës me studentët dhe ju tregoi të vërtetën.
