Deputeti i Partisë Demokratike, Qani Xhafa do të gjykohet nga Gjykata e Posaçme kundër Korrupsionit dhe Krimit të Organizuar për aksidentin e ndodhur më 13 mars të një vitit më parë. Aksidenti ndodhi në bulevardin “Qemal Stafa” në Elbasan.
Sipas “OraNews“, dosja e aksidentit të tij ishte dërguar për gjykim pranë Gjykatës së Shkallës së Parë të Elbasanit, por për shkak se në të është përfshirë një zyrtarë i lartë, togat e zeza kanë shpallur moskompetencë. Duke ia deleguar kështu dosjen GJKKO-së, ndërsa i përzgjedhuri i shortit është gjyqtari Erjon Çela.
Aksidenti ndodhi më datë 13 Mars 2023, e fill pas ngjarjes Xhafa përfundoi në pranga pasi u konstatua se ishte në gjendje të dehur. Por u lirua menjëherë të nesërmen, madje bëri edhe një reagim në rrjetet e tij sociale. Në një postim në Facebook, Xhafa shkruante se është në gjendje të mirë shëndetësore.
“Mirëmbrëma të gjithëve! Duke marrë shkas nga lajmet që qarkullojnë në portale dhe nga mesazhet që më keni dërguar Ju informoj se ndodhem në shtëpi dhe në gjendje të mirë shëndetësore!”
Në kohën e aksidentit, Qani Xhafa ishte kandidat për deputet por pasi Luciano Boçi la mandatin për të garuar për kryetar bashkie në zgjedhjet lokale për Elbasanin, ndaj automatikisht u fut në Kuvend si deputet i Partisë Demokratike.
