Gjiknuri propozon vendosjen me ligj të rrjetit të sinjalizuesve në KQZ, për të njoftuar rastet e shitblerjes së votës. Në ligjin për sinjalisuesit, deputeti Gjiknuri kërkon shtimin e objektit të këtyre informatorëve me “korrupsionin aktiv/pasiv në zgjedhje”
Ndërkaq, parashikohet se në Komisionin Qendror të Zgjedhjeve do të krijohet dhe funksionojë njësia përgjegjëse për marrjen e sinjalizimeve dhe trajtimin e tyre, sipas përcaktimeve të bëra në këtë ligj.
Sinjalizimi mund paraqitet drejtpërdrejt në KQZ ose në Njësinë e Administrimit Zgjedhor. Në rastet kur sinjalizimi paraqitet në Njësinë e Administrimit Zgjedhor ajo ia përcjell atë menjëherë njësisë përgjegjëse në KQZ.
Në përfundim të hetimit administrativ të sinjalizimit, njësia përgjegjëse në KQZ, ne rast se konstaton shkelje administrative vendos sanksione sipas përcaktimeve të bëra në ligj. Për shkelje të ligjit penal paraqet kallëzimin përkatës në prokurori.
KQZ miraton me akt nënligjor procedurat administrative të hetimit të sinjalizimeve dhe afatet kohore të shqyrtimit të tyre. Një nga mekanizmat me ane te te cilit luftohet teorikisht fenomeni i korrupsionit në Shqipëri është edhe sinjalizimi dhe mbrojtja e sinjalizuesve. Çështja e korrupsionit zgjedhor është bërë evidente në disa raporte te OSCE/ODIHR për zgjedhjet në Shqipëri duke kërkuar njëkohësisht edhe marrjen e masave për parandalimin dhe luftimin e një fenomeni te
tillë. Vetë Gjiknuri është një nga emrat që janë lakuar në përgjimet mbi abuzimet zgjedhore që ndodhën në zgjedhjet e kaluara.
/Gazeta Reforma/
