Policia e Fierit ka finalizuar me sukses operacionin antidrogë të koduar “Zona”, pas një hetimi gjashtëmujor për goditjen e një grupi kriminal të përfshirë në shpërndarjen e kokainës në Divjakë.
Si rezultat i këtij operacioni janë vënë në pranga tre persona, mes tyre dy vëllezër të cilët ishin organizatorët e grupit kriminal. Të arrestuarit janë Arnold dhe Maringlen Prifti, si dhe Olsi Lala.
Gjatë kontrolleve, policia ka sekuestruar dhjetëra doza kokaine, tre armë gjahu, një armë sportive, një armë të ftohtë, municion luftarak, dy peshore elektronike dhe shuma të konsiderueshme parash në euro dhe lekë, të përfituara nga aktiviteti i paligjshëm.
Po ashtu, 10 persona të tjerë janë shoqëruar për verifikime mbi përfshirjen e tyre në këtë grup, ndërsa për dy prej tyre, V. Rr. dhe S. B., ka nisur procedimi në gjendje të lirë.
Hetimet kanë zbuluar se ky grup kriminal, i drejtuar nga vëllezërit Prifti, shpërndante kokainë në zonën e Divjakës. Operacioni vijon për të identifikuar dhe arrestuar të gjithë personat e tjerë të përfshirë në këtë aktivitet të paligjshëm.
Materialet procedurale i janë referuar Prokurorisë së Fierit për veprime të mëtejshme ligjore.
