Përshkallëzimi i konfliktit mes Izraelit dhe Iranit ka detyruar mijëra civilë të largohen nga shtëpitë e tyre.
Qeveria izraelite njoftoi se mbi 2,725 persona janë evakuuar që nga nisja e sulmeve javën e kaluar, si pasojë e përballjeve të armatosura me Teheranin.
Bilanci i viktimave në Izrael mbetet 24 të vdekur, ndërsa janë 647 persona të plagosur, përfshirë të paktën 10 në gjendje kritike, sipas të dhënave zyrtare të publikuara nga Zyra e Shtypit të Qeverisë.
Ndërkohë në Iran, i cili është në ditën e pestë të sulmeve ajrore nga ushtria izraelite, shifrat janë edhe më dramatike.
Të paktën 224 persona kanë humbur jetën që nga e premtja, kur Izraeli ndërmori një valë sulmesh të paprecedenta ndaj objektivave strategjikë iranianë, përfshirë infrastrukturën e programit bërthamor dhe figura kyçe të komandës ushtarake.
Përplasja mes dy shteteve është më e rënda që nga nisja e tensioneve dhe ka ngritur shqetësime për një destabilizim më të gjerë në rajonin e Lindjes së Mesme.
