Ditën e sotme nënë e bir kanë rënë në prangat e policisë së Kuçovës, pasi akuzohen se kanë shfrytëzuar në rrjetin social TikTok të miturin 10-vjeçar (djalin e të arrestuarit).
Policia në njoftimin zyrtar bëri me dije se pas hekurave ra shtetasi Armando Kumaraku dhe Natasha Rombula.
Ata publikonin në TikTok video të të miturit, që shfaqej duke sharë dhe duke përdorur një fjalor banal, teksa në këtë mënyrë arrinin të merrnin shumë audiencë në këtë rrjet sociale, duke shfrytëzuar djalin 10-vjeçar.
Dy shtetasit ranë në pranga në kuadër të opecarionit të koduar “Show”, i cili zgjati 2 muaj, pasi po hetohej ngjarja në detaje.
Nënë dhe bir janë aktualisht të arrestuar dhe pritet që shumë shpejt të ketë një vendim nga Gjykata e Shkallës së Parë të Juridiksionit të Përgjithshëm Berat.
NJOFTIMI I POLICISË
Finalizohet pas 2 muajsh hetime me metoda proaktive, operacioni policor i koduar “Show”. Operacioni, nga Komisariati i Policisë Kuçovë, në bashkëpunim me Komisariatin e Policisë Sarandë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat.
Shfrytëzonin një të mitur 10 vjeç, me qëllim përfitimin nga rrjeti social TikTok, duke postuar video të tij, me fjalë denigruese dhe banale, vihen në pranga 2 shtetas (babai dhe gjyshja e të miturit).
Specialistët e Seksionit për Hetimin e Krimeve të Komisariatit të Policisë Kuçovë, pas kallëzimit të marrë në muajin dhjetor 2023, nga shtetasja E. A., se ish-bashkëshorti i saj dhe nëna e tij, postonin në rrjetin social TikTok, video ku shfaqej djali i saj i mitur 10 vjeç, duke përdorur fjalë denigruese dhe banale, menjëherë kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Berat, e cila regjistroi procedimin penal për këtë rast.
Si rezultat i hetimeve dymujore me metoda proaktive, u bë shpallja në kërkim e shtetasve Armando Kumaraku dhe Natasha Rombula.
Pas sigurimit të inteligjencës policore, nga specialistët për Hetimin e Krimeve të Komisariatit të Policisë Kuçovë, për vendndodhjen e këtyre 2 shtetasve, u organizua në bashkëpunim me Komisariatin e Policisë Sarandë, operacioni policor i koduar “Shoë”.
Në kuadër të operacionit, u kapën në Sarandë, 2 shtetasit e shpallur në kërkim, të cilët më pas u shoqëruan në Komisariatin e Policisë Kuçovë, për veprime të mëtejshme procedurale.
Në përfundim të veprimeve të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat, specialistët për Hetimin e Krimeve të Komisariatit të Policisë Kuçovë kanë ndaluar shtetasit A. K., 44 vjeç dhe N. R., 67 vjeçe, të dy banues në Sarandë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
