Ndërkohë që jemi një muaj larg zgjedhjeve të 25 Prillit dhe vetëm pak ditë nga nisja zyrtare e fushatës elektorale, kryeministri Edi Rama i është rikthyer “shfaqjeve teatrale”, ku është vet personazhi kryesor.
Kësaj here ka gjetur një mënyrë të re të komunikimit. I rrethuar nga dhjetëra kamera mjaft mirë të koordinuara, Rama kërkoi edhe njëherë timonin i vetëm.
Sot kryeministri foli për Reformën në Drejtësi, që sipas tij ka qenë kryefjala e këtij mandati qeverisës, dhe në rast se PS nuk do të betohet për një mandat të tretë do të mbesë përgjysmë.
“Më dëgjoni me vëmendje këtë që po përpiqem t’iu them sot, këto zgjedhje lidhen në radhë të parë më fatin e drejtësisë në vendin tonë për një kohë të gjatë pas 25 Prillit, ndoshta për më shumë se një dekadë të tërë”, tha ndër të tjera ai..
Rama, po ashtu, ka deklaruar ditën e sotme se PD dhe LSI dhe presidenti Ilir Meta pengojnë reformën në drejtësi. Më tej kreu i qeverisë tha se PD, LSI, dhe KÇK sot janë 3 këmbët e së keqes së vettingut, të dy kokave presidentësh, që sipas tij nuk e duan reformën në drejtësi.
“PD, LSI, dhe KÇK sot janë 3 këmbët e së keqes së vettingut. Për inat të qeverisë, apo për inatin tim, ju nuk votoni fare, atëherë do të bëni një prej atyre gabimeve fatale në jetën e një vendi që i bën një gjeneratë dhe i paguan gjenerata tjetër. Unë nuk dua t’ju them se ju nuk keni asnjë arsye se pse të jeni të inatosur me mua apo me qeverinë, por përkundrazi mund të keni.”, tha Rama.
Ajo që nuk pritej nga komunikimi i sotëm ishte dorëheqja e Vasilika Hysit pas 12 vitesh në politikë. Arsyeja përse deputetja socialiste është larguar nga strukturat e PS është lënia e hapësirës për të rinjtë. Ky ndryshim u pasua dhe më ndryshimin e kandidatëve të prezantuar për qarkun e Tiranës. Tani kryesuese e listës në këtë qark është ministrja Etilda Gjonaj.
Në mënyrë të përmbledhur nga sa u tha sot në prezantimin e programit për drejtësisë, në fjalimin e kryministrit kishte akuza dhe ankesa kundrejt opozitës. Sa i përket Vetingut, e cilësoi një arritje të qeverisë dhe kërkoi mandatin e tetë për të vijuar me punët e nisura.
