Një konflikt verbal mes dy të rinjve në Golem të Kavajës ka përfunduar në përdorimin e armës së zjarrit në orët e para të mëngjesit të sotëm.
Ngjarja ndodhi pas një sherri që degjeneroi në dhunë fizike, ku njëri prej të përfshirëve nxori armën dhe qëlloi në drejtim të kundërshtarit.
Si pasojë, u plagos 22-vjeçari Luiz Sheqi, i cili u transportua menjëherë në spital. Burime mjekësore bëjnë me dije se ai ndodhet jashtë rrezikut për jetën dhe po trajtohet nën kujdesin e stafit shëndetësor.
Policia ka identifikuar autorin e dyshuar si Shpëtim Dedja, i cili është larguar nga vendngjarja menjëherë pas të shtënave.
Forcat e rendit kanë nisur një operacion për kapjen e tij, ndërsa vijojnë hetimet për zbardhjen e plotë të ngjarjes dhe shkaqet që çuan në përplasjen mes të rinjve.
