Një sherr me thika mes të rinjve ka ndodhur në lagjen “Kamen” të Peshkopisë, ku një 18-vjeçar ka mbetur i plagosur.
Pas ndërhyrjes së shpejtë të Policisë dhe Forcës së Posaçme “Shqiponja”, autori i dyshuar, Orgest Hidri, 18 vjeç, u arrestua në flagrancë.
Konflikti mes të rinjve dyshohet se ka nisur për motive të dobëta dhe ka përfunduar me plagosjen e shtetasit F.K., 18 vjeç, i cili u godit me thikë.
Njoftimi i Policisë:
Dëmtoi me mjet prerës (thikë), një 18-vjeçar, gjatë një konflikti për motive të dobëta, reagimi në kohë i Policisë, çoi në pranga autorin e dyshuar, menjëherë pas ngjarjes.
Shërbimet e Komisariatit të Policisë Dibër, në bashkëpunim me Forcën e Posaçme “Shqiponja”, menjëherë pas marrjes së informacionit se në lagjen “Kamen”, në qytetin e Peshkopisë, po ndodhte një konflikt mes dy të rinjve, menjëherë kanë shkuar në adresën e dhënë.
Si rezultat i reagimit të menjëhershëm dhe hetimeve të kryera, u bë arrestimi në flagrancë i shtetasit O.H., 18 vjeç, banues në Peshkopi.
Ky shtetas pas një konflikti për motive të dobëta, është konfliktuar fizikisht dhe ka dëmtuar me mjet prerës (thikë), shtetasin F.K., 18 vjeç, banues në Peshkopi.
Materialet procedurale i kaluan Prokurorisë pranë Gjykatës së Shkallës së Parë Dibër, për veprime të mëtejshme.
