Mbrëmjen e sotme mjeku infeksionist Pëllumb Pipero ka qenë i ftuar në ‘Opinion’, ku ka dhënë informacione të tjera rreth COVID-19.
Kujtojmë se ndër shenjat kryesore të Coronavirusit është problemi me frymëmarrjen, çka ka bërë që shqiptarët të telefonojnë 127 për problemin më të vogël.
Mirëpo, mjeku tregon se jo domosdoshmërisht kjo do të thotë se jeni i prekur nga COVID-19, pasi vështirësia me frymëmarrjen shfaqen bashkë me kollën dhe temperaturën.
Madje, Pipero ndau edhe një sekret mjekësor duke thënë se pengesa në frymëmarrje është e ndryshme nga vështirësia në frymëmarrje dhe se ajo fillon kur personi ka më shumë se 30 frymëmarrje në minutë, nga 18-24 që është norma.
Po ashtu, mjeku tha se ka patur një bisedë telefonike me mjekët kinezë që kanë mbërritur për të asistar në Itali dhe i kishin thënë se Italia përsoi një kolaps pasi e kishin nënvlerësuar virusin dhe madje as tani nuk po e respektojnë karantinën.
“Fola me ta nëpërmjet një mikut tim në Itali. Dhe ata me batutë thanë se ne e pësuam nga padituria, ndërsa mjekët italianë e pësuan nga mendjemadhësia. Ata e donin se qarkullonte virusi po nuk morën masa,”-tha Pipero.
Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.
OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.
Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.
Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.
