Udhëheqësit e qeverive të Ballkanit Perëndimor, parashikohet që të bëjnë takimin e radhës në kuadër të iniciativës rajonale për shengenin ballkanik.
Mirëpo ky takim do të jetë më ndryshe se ai i Nishit, Tiranës dhe Ohrit, pasi do të zhvillohet përmes platformës online të Zoom, javën e ardhshme.
Edhe pse kryeministri Rama ka përsëritur ftesën për pjesëmarrjen e Kosovës në takimet e shengenit ballkanik, mbetet për t’u parë pjesëmarrja apo jo e Kosovës, ndonëse ky takim nuk do të jetë fizik por nëpërmjet platformës online.
Një prej pikave të marrëveshjes së firmosur nga pala kosovare me në krye kryeministrin Avdullah Hoti në Uashington, ishte edhe ulja në tryezën e bisedimeve për Shengenin Ballkanik, por ende nuk dihet a do të jetë pjesëmarrëse apo jo pala kosovare në këtë takim të rradhës së Shengenit rajonal.
Kujtojmë se edhe gjatë vizitës së kryeministrit Hoti me homologun e tij Zaev në Shkup, ky i fundit i ka përsëritur ftesën kryeministrit Hoti ku theksoi se se Kosova duhet të afrohet me iniciativën rajonale të Shengenit Ballkanik me qëllim që të jetë prioritet për rajonin, pa dallim të çështjeve të hapura politike.
Zaev në konferencën për shtyp, e konfirmoi takimin me presidentin Vuçic dhe kryeministrin Rama. Ky takim përmes Zoom mbart edhe disa pikëpyetje të tjera për përfaqësimin e Malit e të Zi si dhe Bosnjës./GazetaReforma.com/
