Sistemi shëndetësor shqiptar është në prag të një kolapsi të madh tashmë që pandemia COVID-19 është përhapur me ritme të shpejta në të gjithë vendin. Sikur të mos mjaftonte kjo, tashmë spitalet bëjnë edhe përzgjedhje mes atyre që duhet të kurojnë dhe atyre që nuk duhet. Skandali më i fundit ka të bëjë me rastin e një 48-vjeçari, që u la të vdiste në mes të rrugës. Kreshnik Kaçi ndërroi jetë ditën e djeshme pasi u sorollat me pretekstin se ishte ‘i palarë’, siç denoncuan fqinjët e tij. Lajmin për ndarjen nga jeta të Kaçit e konfirmuan vetë fqinjët, duke thënë se u nxorr nga spitali e u la në mes të rrugës.
Spitali i Traumës i mohoi fillimisht ndihmën 48-vjeçarit e më pas ai u dërgua në spitalin COVID 2 ku edhe ka ndërruar jetë.
Fax News publikoi pak ditë më parë denoncimin e një qytetari për Kreshnik Kaçin, i cili banonte vetëm në shtëpi dhe u kërkoi ndihmë autoriteteve shëndetësore, por këta të fundit nuk e pranuan.
Sipas denoncuesve, ambulance refuzoi ta merrte qytetarin pasi ai nuk ishte pastruar. Ndërkohë, fqinjët e tij e pastruan e morën sërish ambulancën për ta çuar në Spitalin e Traumës. Të nesërmen kur ata shkuan për ta vizituar, panë se ai ishte lënë jashtë, pa marr shërbimin e nevojshëm mjekësor.
Pas rastit skandaloz qytetarët i kërkuan llogari stafit të spitalit se përse e hodhi të sëmurin në mes të rrugës, por nuk kanë marrë asnjë përgjigje. Ata denoncuan sërish rastin në Fax News dhe ambulance erdhi ta merrte 48-vjeçarin 30 minuta më vonë për ta dërguar në spitalin COVID-2 ku ndërroi jetë.
Kjo është panorama që rrëzon gjithë propagandën e shëndetësisë falas, pasi nëse nuk ke të paguash hidhesh në rrugë e nuk të ofrohet asnjë shërbim. Veç faktit që spitalet janë në gjendje të mjerueshme, aty vendoset edhe kush duhet të jetojë e kush jo.Jo më kot më të pasurit zgjodhën të kuroheshin jashtë vendit nga COVID-19 sepse në Shqipëri nuk ofrohet asnjë shërbim dhe shëndetësia është në kolaps total.
