Teksa edhe pak minuta na ndajnë nga nisja e protestës mbarëkombëtare të thirrur nga Aleanca për Mbrojtjen e Teatrit dhe e mbështetur nga opozita, presidenti Ilir Meta po mban një takim me ambasadorë të BE në vendin tonë.
Sipas News 24, takimi mes kreut të shtetit dhe 4 diplomatëve të huaj po mbahet në Pallatin e Brigadave dhe në fokus të takimit është situata që po përjeton vendi ynë.
Sipas informacioneve paraprake, bëhet me dije se në takim është thirrur edhe ambasadorja e SHBA-së, Yuri Kim, por ajo nuk i është përgjigjur ftesës së Metës, për motive ende të paqarta.
Kujtojmë se presidenti e ankimoi vendimin e qeverisë për kalimin në pronësi të Bashkisë Tiranë godinën tanimë të rrafshuar të Teatrit Kombëtar, pasi kërkonte shfuqëzimin nga Gjykata Kushtetuese të këtij vendimi.
Gjatë orëve të para të mëngjesit të djeshëm u shemb godina e Teatrit Kombëtar, ku pati përplasje të njëpasnjëshme gjatë ditës mes Policisë dhe protestuesëve. Në Polici janë shoqëruar dhjetëra aktivistë, aktorë e figura të opozitës, teksa kjo e fundit ka paralajmëruar për aksion opozitar.
Pas pak, në 16:30 nis protesta mbarëkombëtare e thirrur nga Alenca për Mbrojtjen e Teatrit ndërsa Policia gjatë gjithë ditës së sotme është përgatitur dhe ka blinduar me efektivë të gjithë zonën, ku do zhvillohet protesta. Lleshaj paradite zhvilloi një takim me drejtuesit e Policisë ku ka dhënë urdhër që të jenë mbi 1000 efektivë në protestë.
