Shembja e Teatrit Kombëtar ka bërë jehonë në mediat ndërkombëtare. Associated Press shkruan se fjala e presidentit nuk dëgjohet më, madje gruaja e tij Monika Kryemadhi u shoqërua nga policia në komisariat.
Bujë janë bërë protestat e dhunshme lidhur me ngjarjen, ku janë dhunuar fizikisht gazetarë, artistë e qytetarë që për gati dy vite rezistuan kundër prishjes së godinës së Teatrit Kombëtar.
Për më shumë se dhjetë orë, qytetarët kanë protestuar ditën e sotme të revoltuar pas shembjes së teatrit në mënyrë të beftë në orët e para të mëngjesit të sotëm.
Në shkrim theksohet se: “Policia largoi me forcë një grup artistësh dhe disa drejtues të opozitës nga ndërtesa e Teatrit mëngjesin e kësaj të diele para se makineritë e rënda të fillonin ta rrëzonin atë.
Vendimi i qeverisë për të shkatërruar Teatrin e vjetër Kombëtar, të ndërtuar nga italianët kur ata pushtuan Shqipërinë gjatë Luftës së Dytë Botërore, u kundërshtua nga artistë dhe të tjerë që e donin atë të rinovuar.
Një politikan i opozitës tha se 30 persona, përfshirë një gazetar, u arrestuan nga policia. Autoritetet nuk e kanë komentuar raportimin.
Pamjet televizive treguan Monika Kryemadhin, drejtuese e një partie të vogël opozitare dhe bashkëshorte e Presidentit të vendit, duke u futur në një furgon policie. Pozita e presidentit në Shqipëri është kryesisht një post ceremonial”, shkruhet në artikullin e AP.
