Një ngjarje e rëndë ka tronditur komunitetin e Bulqizës mesditën e sotme, ku një minator ka humbur jetën në një aksident gjatë punës në subjektin minerar “Jeton Dani”.
Viktima është identifikuar si Fari Veliu, 60 vjeç, i cili u përfshi nga rrëzimi i masivit të kromit brenda galerisë. Fatkeqësisht, masivi që u shemb në punë e ka zënë minatorin, duke i marrë jetën në vend.
Trupi i 60-vjeçarit është nxjerrë nga galeria dhe është dërguar në morg për ekspertizë, pasi aksidenti ndodhi në një thellësi të moderuar nëntokë, ku ndërhyrja ishte e mundur nga grupet e emergjencës.
Ky nuk është rasti i parë tragjik në minierat e Bulqizës. Pak kohë më parë, në minierën e Thekës në Martanesh, pas rrëzimit të një masivi gurësh, humbi jetën minatori me inicialet A.P., ndërsa një tjetër punëtor, Hajdar Bala, u plagos rëndë dhe u dërgua me helikopter drejt Tiranës për trajtim.
Në një rast tjetër të rëndë në zonën e Klosit, 29-vjeçari Ardit Beshiri u zhduk nën dheun e rrëshqitur gjatë punës me fadromë dhe u gjet i pajetë vetëm pas shtatë ditësh kërkimesh intensive. Për gjetjen e tij u angazhuan forca të shumta, përfshirë edhe Forcat e Armatosura të Shqipërisë dhe Forcën e Sigurisë së Kosovës.
Pavarësisht rasteve të përsëritura dhe pasojave të rënda, masat për garantimin e sigurisë në punë në minierat shqiptare mungojnë.
Aksidentet vijojnë, dhe jeta e minatorëve mbetet e ekspozuar ndaj rrezikut çdo ditë. Në një industri ku puna zhvillohet në kushte ekstreme, mungesa e mbrojtjes ligjore dhe teknike po i kthen galeritë në varre të hapura.
