Departamenti Amerikan i Shtetit ka vendosur katër grupe europiane të ANTIFA si organizata terroriste, një hap që hyn në fuqi javën e ardhshme dhe i vendos ato në të njëjtën kategori me organizata si ISIS k dhe Al Shabaab. Grupet operojnë në Gjermani, Itali dhe Greqi, ndërsa pas shpalljes, çdo ndërveprim apo mbështetje ndaj tyre do të ndalohet për shtetasit amerikanë.
Sekretari amerikan i shtetit, Marco Rubio, deklaroi se anëtarët e Antifa Ost, Federata Informale Anarkiste Fronti Ndërkombëtar Revolucionar (FAI FRI), Vetëmbrojtja e Klasës Revolucionare dhe Drejtësia Proletare e Armatosur janë caktuar si “terroristë globalë të caktuar posaçërisht”, duke theksuar se vendimi vijon qasjen e administratës Trump për “kundërshtimin e fushatës së dhunës politike”. Ai tha se synon që nga 20 nëntori t’i rendisë këto grupe edhe si “organizata terroriste të huaja”, duke paralajmëruar shënjestrime të tjera në nivel global.
“Grupet e lidhura me këtë lëvizje drejtohen nga ideologji revolucionare anarkiste ose marksiste, duke përfshirë anti amerikanizmin, anti kapitalizmin dhe anti krishterimin, duke i përdorur ato për të nxitur dhe justifikuar sulme të dhunshme brenda dhe jashtë vendit,” u shpreh Rubio. Ai shtoi se SHBA do të përdorë çdo mjet të mundshëm për të mbrojtur sigurinë dhe për t’u mohuar këtyre grupeve financimin dhe burimet që i mbështesin.
Sipas Departamentit të Shtetit, Antifa Ost me qendër në Gjermani dyshohet për sulme kundër personave që grupi i konsideronte “fashistë” mes viteve 2018 dhe 2023, si edhe për një seri sulmesh në Budapest në shkurt të vitit 2023. Hungaria e ka shpallur këtë grup organizatë terroriste më herët gjatë vitit.
Në informacionet zyrtare thuhet se FAI FRI “ka marrë përgjegjësinë për kërcënimet me dhunë, bomba dhe letra bomba kundër institucioneve politike dhe ekonomike, duke përfshirë gjykatat dhe institucione të tjera kapitaliste”.
Vetëmbrojtja e Klasës Revolucionare “mori përgjegjësinë për dy sulme me pajisje shpërthyese të improvizuara që synonin Ministrinë Greke të Punës dhe zyrat e Hekurudhave Helenike”, ndërsa Drejtësia Proletare e Armatosur “mori përgjegjësinë për vendosjen e një bombe pranë selisë së policisë greke të trazirave në Goudi, Greqi, më 18 dhjetor 2023”.
Vendimi vjen ndërsa presidenti amerikan Donald Trump ka ashpërsuar lëvizjen kundër ANTIFA, të cilën ai dhe aleatët republikanë e akuzojnë për nxitje të dhunës politike. Në shtator, Trump nënshkroi një urdhër ekzekutiv që e klasifikon ANTIFA si organizatë terroriste brenda SHBA dhe kërkoi veprime shtesë nga autoritetet. Ai e ka lidhur lëvizjen me protestat kundër agjencisë ICE në Los Angeles, Chicago dhe Portland, si edhe me reagimet pas vrasjes së aktivistit konservator Charlie Kirk.
Ky zhvillim shënon një zgjerim të politikës amerikane ndaj grupeve të ekstremizmit të majtë në Europë, duke e bërë qartë se Uashingtoni do të vazhdojë të ndërmarrë masa të reja kundër celulave të ANTIFA në kontinent.
