Stafi i Shtëpisë së Bardhë në Washington D.C. është alarmuar pas një pakoje të pazakontë që mbërriti në postën e rezidencës presidenciale.
Një zarf që i ishte drejtuar kutisë postare të Shtëpisë së Bardhë, përmbante një substancë të identifikuar si ricin, një lëndë helmuese vdekjeprurëse, njoftuan disa media të shtunën në SHBA.
Ato citonin një zyrtar federal të informuar për këtë çështje, njofton Zëri i Amerikës.
Zarfi që besohet të ketë ardhur nga Kanadaja, u kap në një qendër postare qeveritare para se të mbërrinte në Shtëpinë e Bardhë, njoftuan “New York Times”, “CNN” dhe “Wall Street Journal”.
I pyetur në lidhje me njoftimet, FBI-ja tha se, “agjencia dhe Shërbimi Sekret i Shteteve të Bashkuara dhe partnerët e Shërbimit të Inspektimit Postar, po hetojnë një letër të dyshimtë të marrë në një objekt të postës qeveritare. Në këtë moment, nuk ka ndonjë kërcënim për sigurinë publike”.
Shtëpia e Bardhë dhe Shërbimi Sekret i SHBA-ve, nuk pranuan të komentojnë.
Ricini gjendet në gjendje të natyrshme, por duhet ndërmarrë një veprim i qëllimshëm për ta shndërruar atë në një armë biologjike.
Ricini mund të shkaktojë vdekje brenda 36 deri në 72 orësh nga ekspozimi në një sasi aq të vogël, sa një majë gjilpëre. Asnjë antidot i njohur nuk ekziston.
Ka pasur incidente të shumta që përfshijnë zarfe të postuara me ricin për zyrtarët amerikanë.
Në vitin 2018, një person nga Utah, William Clyde Allen III, u akuzua për kërcënimeve të lidhura me ricin, përfshirë postimin e një kërcënimi kundër Trump dhe zyrtarëve të tjerë federalë përfshirë Drejtorin e FBI-së, Christopher Wray.
Të gjitha zarfet e dërguara përmbanin ricin. Allen mbetet në paraburgim. Dy persona u dënuan në incidente të veçanta, për dërgimin e letrave të me ricin Presidentit të atëhershëm Barack Obama.
Në maj të vitit 2014, një person nga Misisipi, James Everett Dutschke, u dënua me 25 vjet burg pasi u shpall fajtor për dërgimin e letrave me substancën vdekjeprurëse zotit Obama, si dhe një senatori amerikan dhe një gjykatës i shtetit.
Në korrik 2014, një aktor nga Teksasi u dënua me 18 vjet për dërgimin e letrave që përmbanin ricin për zotin Obama dhe ish-kryebashkiakun e New York-ut, Michael Bloomberg.
/GazetaReforma.com/
