Tashmë numri i të infektuarve nga koronavirusi në rang botëror ka shkuar në 2,026,823, teksa janë shënuar 129,099 viktima.
E teksa në disa vende situata duket e rënduar, në vende të tjera gjendja duket më e normalizuar.
Së fundmi, Zëri i Amerikës shkruan se drejtori i Qendrave Federale për Kontrollin dhe Parandalimin e Sëmundjeve në SHBA ka thënë se rreth 20 shtete amerikane janë ndikuar pak nga koronavirusi dhe se zyrtarët besojnë se mund të jenë të gatshëm të rihapen deri më 1 maj, data e caktuar nga presidenti Donald Trump.
“Janë një numër distriktesh në SHBA që nuk kanë patur koronavirus pavarësisht testimeve. Janë një numër shtetesh amerikane, 19 ose 20, që në fakt kanë pasur ndikim të kufizuar. Prandaj mendoj se do të shohim disa shtete, zyrtarët e të cilëve mendojnë se janë gati. Edhe ne jemi gati t’i ndihmojmë ata për rihapjen,” tha zoti Redfield.
Në Shtetet e Bashkuara, numri i të vdekurve nga koronavirusi deri tani është mbi 26,000 dhe ai i të infektuarve mbi 600 mijë.
Plani i ringritjes përmban tre faza: Një fushatë kombëtare komunikimi dhe vlerësim se sa të gatshme janë komunitetet për rihapjen deri më 1 maj; shtimi i fondeve të emergjencës dhe prodhimi i kompleteve të testimit apo i pajisjeve personale mbrojtëse deri më 15 maj; rihapje graduale në varësi të kushteve lokale.
Nga ana tjetër, presidenti Trump ka njoftuar se është pranë finalizimit të një plani për t’i dhënë fund mbylljes së SHBA-së për shkak të koronavirusit, që ka sjellë eliminimin e miliona vendeve të punës, duke shtuar se në disa zona, ekonomia mund të rifillojë edhe para 1 majit.
Mbrëmë, presidenti vuri përsëri në shënjestër Organizatën Botërore të Shëndetësisë, duke thënë se ka udhëzuar administratën që të ndalë fondet amerikane për këtë institucion me qendër në Gjenevë për shkak të mënyrës se si e trajtoi pandeminë e koronavirusit.
