SHBA dhe Ukraina kanë arritur një marrëveshje për bashkëpunim në shfrytëzimin e përbashkët të burimeve natyrore të Ukrainës, përfshirë energjinë dhe mineralet kritike.
Kjo marrëveshje, e arritur pas negociatash të gjata dhe të ndërlikuara, përfshin krijimin e një fondi të përbashkët investimesh që synon rindërtimin ekonomik të vendit të shkatërruar nga lufta me Rusinë.
Sekretari amerikan i Thesarit, Scott Bessent, e cilësoi marrëveshjen si një shenjë të qartë të përkushtimit të dy vendeve për paqe dhe zhvillim afatgjatë.
Ndërkohë, për qeverinë ukrainase, kjo iniciativë shihet si kyçe për të ruajtur aksesin në ndihmën ushtarake nga SHBA.
Ukraina zotëron rezerva të konsiderueshme të mineraleve strategjike si grafiti, titani dhe litiumi, të cilat janë me interes të lartë për sektorin e energjisë së gjelbër, mbrojtjes dhe industrisë moderne.
Zëvendëskryeministrja ukrainase Yulia Svyrydenko, e pranishme në Washington për nënshkrimin e marrëveshjes, deklaroi se fondi do të shërbejë për tërheqjen e kapitalit ndërkombëtar dhe do të përfshijë projekte në fushat e mineraleve, naftës dhe gazit, ndërsa pronësia mbi burimet do të mbetet në duart e Ukrainës.
Partneriteti SHBA-Ukrainë do të funksionojë mbi baza të barabarta, me ndarje 50:50, dhe pritet të ratifikohet nga parlamenti ukrainas.
Në kuadër të marrëveshjes, Uashingtoni ka premtuar mbështetje të mëtejshme për Kievin, përfshirë sisteme të reja të mbrojtjes ajrore.
