Në prag të sezonit veror dhe përballë rrezikut në rritje nga zjarret masive, Shtetet e Bashkuara kanë nisur një seri trajnimesh të përbashkëta me Forcat Ajrore Shqiptare.
Ambasada amerikane në Tiranë bëri të ditur përmes një njoftimi në rrjetet sociale se këshilltarët ushtarakë amerikanë po punojnë me forcat shqiptare për të rritur kapacitetet e reagimit ndaj emergjencave natyrore, me fokus të veçantë në luftimin e zjarreve.
Stërvitjet po zhvillohen në Bazën Ajrore të Farkës dhe përfshijnë përdorimin e mjeteve ajrore për fikjen e zjarreve me pajisje të specializuara të njohura si “Bambi buckets”, kova të mëdha uji që varen nga helikopterët për të shuar zjarret në zona të vështira malore apo të paarritshme.
“Sezoni veror ka filluar, këshilltarët e Ushtrisë Amerikane po ndihmojnë Forcat Ajrore Shqiptare të arrijnë potencialin e tyre maksimal përmes trajnimeve të specializuara për reagimin ndaj zjarreve,” thuhet në deklaratën e Ambasadës së SHBA.
Ky bashkëpunim, i cilësuar si një element kyç i gatishmërisë rajonale, vjen në vazhdën e mbështetjes që SHBA i ofron Shqipërisë në rritjen e kapaciteteve të sigurisë, mbrojtjes civile dhe përballimit të situatave të jashtëzakonshme, në një kohë kur ndikimi i ndryshimeve klimatike po e rrit frekuencën dhe intensitetin e fatkeqësive natyrore.
Trajnimet pritet të forcojnë jo vetëm reagimin kombëtar ndaj emergjencave, por edhe bashkëpunimin ndërinstitucional dhe ndërkombëtar për menaxhimin efektiv të krizave në të gjithë rajonin.
