Kryeministri Edi Rama ka reaguar sërish sa i përket çështjes së testeve për COVID-19, pasi Shtetet e Bashkuara të Amerikës i kanë dhuruar Shqipërisë 30 mijë teste për koronavirusin.
Rama e ka vlerësuar këtë ndihmë nga ana e SHBA-së, duke thënë se kjo gjë e lumturon shumë, por sipas tij kjo nuk do të thotë se numri i testeve që bëhen kushtëzohet nga stoku.
Ndërsa rreth deklaratave të PD-së për të bërë sa më shumë teste, kreu i qeverisë tha se një gjë të tillë e vendos Komiteti Teknik.
“A mundet dikush t’ia thotë PD se qeveria nuk vendos sa teste bëhen a nuk bëhen?! Aq më pak qeveria mund të marrë mendjen e PD-së për këtë punë! Strategjinë e testeve e bën Komiteti Teknik i Ekspertëve dhe PIKË! Qeveria zbaton ato që vendos Komiteti dhe PIKË! PD i’a fut kot. PIKË! Patjetër na lumturon reagimi pozitiv i SHBA për ta adresuar ndihmën bujare në funksion të stokut të testeve!Po kjo s’dmth fare se numri i testeve që bëhen kushtëzohet nga stoku. Nqs Komiteti Teknik do thoshte 2000 teste në ditë do kishte 2000 në ditë! LBPD vazhdon ia fut kot. PIKË!” shkruan Rama.
Ky reagim nga ana e kryeministrit vjen pasi më herët kryedemokrati, Lulzim Basha, teksa falenderoi SHBA-në për ndihmën u shpreh se testimi dhe izolimi janë e vetmja mënyrë për të ndërprerë zinxhirin e infeksionit dhe për të mposhtur virusin.
