Ditën e djeshme kuqezinjtë e Edi Rejës fituan në ndeshjen miqësore përballë Kosovës me rezultatin 2-1 me golat e Balajt dhe Uzunit.
Por djemtë e Kombëtares tonë kanë dhe dy ndeshje shumë të rëndësishme gjatë këtij muaji, me Kazakistanin më 15 nëntor dhe me Bjellorusinë më 18, ndeshje të vlefshme për Ligën e Kombeve.
Kombëtarja jonë do të zbresë në fushë me shumë mungesa pasi disa prej lojtarëve nuk janë lejuar të udhetojnë për shkak të masave kufizuese që ekipet e tyre kanë marrë për të ndaluar përhapjen e Covid-19, por edhe për shkak të dëmtimeve fizike që lojtarët kanë pësuar.
Kujtojmë këtu Kumbullën, Roshin, Strakoshën apo Trashin e Lenjanin të cilët nuki mundën t’i bashkoheshin djemve të tjerë.Por edhe pse me mungesa dhe me probleme, ka lajme të mira për teknikun Reja pasi të premten bashkohet me grupin një nga elementët më thelbësor në skemat e tij, Klas Gjasula ndërsa do të jenë në dispozicion edhe Broja e Cikalleshi. Të dy lojtarët kanë lënë pas dëmtimet dhe do të jenë një opsion më shumë për teknikun italian, mbi të gjitha sulmuesi i Viteshe i cili po kalon një formë shumë të mirë në kampionatin holandez. Reja mund të mbështet edhe te eksperienca e Memushaj dhe Abrashi, ky i fundit një titullarë i padiskutueshëm.
Ndërkohë kujtojmë se paraqitje të shkëlqyer bëri dhe Myrto Uzuni dhe prurjet e reja që ishin zgjedhur për të debutuar në atë ndeshje miqësore që tregoi shumë për Kombëtaren tonë.
Në dy ndeshjet e radhës Shqipërisë i duhet të fitojë për të rrëmbyer kreun e grupin dhe për ti dhënë më shumë qetësi trajnerit për pjesën e mbetur të Ligës së Kombeve dhe për të vijuar me besim e shpresë projektin e FSHF-ës për të synuar kualifikimin për në “Euro2024”.
