Sezoni veror: Nga 19 qershori deri më 15 shtator, ndalohet lëvizja e mjeteve mbi 7.5 ton në fundjavë dhe festa

Policia e Shtetit ka njoftuar vendosjen e kufizimeve të përkohshme për qarkullimin e mjeteve të rënda gjatë sezonit veror 2026, me synim rritjen e sigurisë rrugore dhe lehtësimin e trafikut në akset turistike.

Masat do të zbatohen nga 19 qershori deri më 15 shtator dhe prekin mjetet e transportit të mallrave me masë totale të autorizuar mbi 7.5 ton, si dhe kategori të tjera të përcaktuara në udhëzim.

Sipas njoftimit, kufizimet do të aplikohen:

• Të premten nga ora 15:00 deri në 24:00
• Të shtunën nga ora 07:00 deri në 24:00
• Të dielën nga ora 07:00 deri në 24:00

Gjatë festave zyrtare, ndalimi nis nga ora 15:00 e ditës pararendëse dhe vazhdon deri në fund të ditës së festës.

Kufizimet do të zbatohen në autostrada, rrugë interurbane dhe akse që lidhin zonat bregdetare e turistike, ku gjatë verës regjistrohen flukse të larta lëvizjeje.

Nga këto masa përjashtohen mjetet e emergjencës, Policia e Shtetit, institucionet shtetërore dhe transporti i mallrave të domosdoshme, përfshirë produktet ushqimore që prishen. Në raste të veçanta mund të jepen autorizime speciale nga autoritetet kompetente.

Policia u bën thirrje operatorëve të transportit dhe drejtuesve të mjeteve të respektojnë kufizimet për të shmangur aksidentet dhe bllokimet e trafikut gjatë sezonit turistik.