U duk se tërmeti që goditi Turqinë dhe Greqinë i qetësoi paksa marrëdhëniet e tyre por nuk zgjati shumë.
Mediat greke bëjnë me dije se janë rikthyer tensionet midis dy vendeve, kjo pasi Ankaraja me anijen ‘Orus Reis’ ka nisur kërkimet në det dhe këto kërkime do të zgjasin deri më 23 nëntor.
Mësohet se anija ndodhet 20 milje në lindje të Rodosit. Zona e studimit nga turqit është përcaktuar 12 milje nga Rodosi, duke paralajmëruar se do të afrohet akoma më shumë.
Ndaj kësaj ka reaguar qeveria Greke duke thënë se ky veprim përshkallëzon më shumë konfliktin, teksa shkruan se presin që Këshilli i ardhshëm Europian në dhjetor të diskutojë për këtë çështje.
“Ky veprim shton përshkallëzimin gjithnjë në rritje të sjelljes delikuente turke në Mesdheun Lindor.
Ne e dënojmë atë në mënyrën më kategorike dhe presim që ajo të diskutohet plotësisht në Këshillin e ardhshëm Evropian në Dhjetor” thekson Athina.
Marrëdhëniet midis Greqisë dhe Turqisë u tensionuan më 10 gusht, kur Ankaraja vendosi të dërgojë anijen Oruç Reis të shoqëruar nga marina turke në kërkim të hidrokarbureve në Mesdhun Lindor.
Greqia i ka cilësuar kërkimet të paligjshme, pasi sipas marrëveshjes që ajo nënshkroi me Libinë, Athina zyrtare ka të drejtën e shëlfit të saj kontinental. Çka do të thotë se ujrat territoriale greke shtrihen në 12 milje. Turqia nga ana tjetër nuk i njeh asaj këtë të drejtë, duke insistuar se vendi nuk do të heqë dorë nga të drejtat e tij në Mesdhe.
