Shtimi i rasteve të reja ka sjellë tension tek qytetarët por gjithashtu edhe tek autoritetet e vendeve të ndryshme. Për të parandaluar një përhapje të gjerë të varianteve të reja shumë shtete po vazhdojnë me marrjen e dozës së tretë duke e shpërndarë sa më gjerë në popullatë. Një vend tjetër që i bashkohet kësaj ‘nisme’ është dhe Serbia.
Shteti serb i është bashkuar shteteve si Izraeli duke ofruar dozën e tretë të vaksinës për qytetarët. Deri më tani autoritetet shëndetësore thonë se kanë administruar mbi 80 mijë doza përforcuese. Serbia ka vaksinuar deri më tani mbi 50% të popullsisë prej 7 milion banorësh me dy doza të vaksinës, por fushata është ngadalësuar për shkak të mungesës së interesit dhe rezistencës së grupve kundër imunizimit. Gjithashtu kujtojmë se varianti ‘Delta’ po përhapet me ritme të shpejta duke rrezikuar kështu shtimin e rasteve të reja.
Mbi bazë të udhëzimeve të qeverisë, të gjithë ata që kanë marrë dozën e dytë të paktën 6 muaj më parë, pacientët me imunitet të dobët dhe punonjësit e shëndetësisë do të mund të marrin dozën e tretë. Serbët mund të zgjedhin mes 4 vaksinave; ato të Pfizer dhe Biontech, kinezes Sinofarm, Astrazenecas dhe ruses Sputnik. Deri më tani, Covid-19 i ka marrë jetën 7226 personave në Serbi, ndërsa mbi 740 mijë njerëz janë infektuar me koronavirus.
