Sekuestrohet apartamenti luksoz në Lushnjë, ja çfarë dyshohet

Ditën e sotme policia ka sekuestruar një apartament me vlerë 270 mijë euro në Lushnjë.

Bëhet e ditur nga uniformat blu se dyshohet se apartamenti është përfituar nga veprimtari kriminale në fushën e narkotikëve.

Ndërkohë mësohet se apartamenti i përket 32-vjeçarit Marsel Korreshi nga Lushnja, i cili është dënuar më parë , për veprën penale “Prodhimi dhe shitja e lëndëve narkotike”.

Njoftimi i Plotë i Policisë së Shtetit:

Lushnjë/ Sekuestrohet apartamenti me vlerë 270 000 euro, i dyshuar i përfituar nga veprimtari kriminale në fushën e narkotikëve, të kryera nga një 32-vjeçar.

Nga specialistët e seksionit për Hetimin e Krimeve Ekonomiko-Financiare të Drejtorisë Vendore të Policisë Fier, në bashkëpunim me Prokurorinë pranë Gjykatës së Rrethit Gjyqësor Lushnjë, u bë ekzekutimi i vendimit të Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së shtetasit Marsel Korreshi, 32 vjeç, banues në Lushnjë, i dënuar më parë, për veprën penale “Prodhimi dhe shitja e lëndëve narkotike”. Nga veprimet hetimore rezulton se pasuria e 32-vjeçarit ka si burim veprimtari kriminale.

Në zbatim të vendimit të Gjykatës u bë sekuestrimi i një pasurie të paluajtshme (apartament në Tiranë), me vlerë 270 000 euro.

Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe të personave të lidhur me të.