Operacioni policor i koduar “Hidden Funds” është finalizuar nga Seksioni për Hetimin e Pastrimit të Parave dhe Aseteve Kriminale në DVP Tiranë, në bashkëpunim me Prokurorinë e Tiranës.
Në përfundim të hetimeve u procedua penalisht shtetasja E. K., 72 vjeçe, pronare e një subjekti “exchange”, e dyshuar për veprimtari të paligjshme financiare.
Sipas policisë, në ambientet e këtij subjekti janë depozituar në mënyrë të përsëritur shuma të mëdha parash nga persona të ndryshëm, të cilat nuk janë deklaruar dhe janë përdorur për dhënie huash me interes, jashtë sistemit bankar.
Gjatë operacionit u sekuestruan rreth 500 mijë euro, të dyshuara si të përfituara nga veprimtari kriminale. E. K. është proceduar në gjendje të lirë, ndërsa hetimet vijojnë për identifikimin dhe ndjekjen penale të personave të tjerë të përfshirë në këtë skemë.
Materialet procedurale i janë referuar Prokurorisë së Tiranës për vijimin e mëtejshëm të veprimeve hetimore.
