Sebastian Kurz , ish-kancelari austriak dhe lideri aktual i ÖVP tërhiqet përfundimisht nga politika.
Sipas asaj që ai u shpreh në Vjenë, shkaku kryesor i kësaj tërheqje nga politika ka qenë lindja e djalit të tij dhe përkushtimi ndaj familjes.
Për dhjetë vjet, Kurzi qe angazhuar në Austri në poste të ndryshme qeveritare. Megjithatë, muajt dhe javët e fundit qenë të vështira.
“Ndihesha i përndjekur ndonjëherë”, është shprehur Kurz. Tani që është bërë baba, prioritetet e tij kanë ndryshuar. Ai e kishte kuptuar se kishte lënë pas dore fusha të tjera përveç politikës. Për më tepër, entuziazmi i tij për politikën është zbehur ndërkohë.
Kurz-i dha dorëheqjen si kryetar i qeverisë në tetor, pasi hetuesit e korrupsionit bastisën ndër të tjera kancelarinë dhe selinë e ÖVP . Kurz-i dhe disa nga bashkëpunëtorët e tij të ngushtë politikë dyshohen nga prokuroria se kanë publikuar në media sondazhe të manipuluara. Për këtë qëllim thuhet se janë shpërdorur fonde publike. Ata akuzohen veçanërisht për shkelje të besimit. Kurz, i cili kundërshton akuzat, u bë anëtar i parlamentit si kryetar grupi parlamentar, pasi dha dorëheqjen nga posti i tij. Ai mbeti gjithashtu kryetar i ÖVP.
Kujtojmë që në mesin e nëntorit, parlamenti austriak votoi për heqjen e imunitetit të Kurzit në mënyrë që të lejojë që akuzat të sqarohen shpejt.
