Seanca në ngarkim të ish-ministrit të Mbrojtjes, Fatmir Mediu, për çështjen “Gërdeci” është shtyrë përsëri.
Gjykata e Posaçme ka vendosur që seanca e radhës të mbahet më 27 dhjetor në orën 12:00. Shkaku i shtyrjes ishte kërkesa e gjykatës për t’i dhënë kohë avokatëve mbrojtës të përgatisin pyetjet për ekspertët ushtarakë që kanë përcaktuar shkakun e shpërthimit në Gërdec.
Pas seancës, Mediu deklaroi për mediat se ishte absurde dhe e papranueshme që një ministër të gjykohej për çështje ushtarake, të cilat sipas tij nuk lidhen me detyrën e tij.
“Është një situatë kaq absurde sa është tërësisht e papranueshme që ministri të gjykohet se ca janë kalibrat apo elemente të tjerë që nuk kanë të bëjnë me detyrën e tij. Këto çështje janë të karakterit ushtarak. Ne jemi vend anëtar i NATO-s dhe janë të ndara përgjegjësitë civile dhe ushtarake. Jemi në një realitet që është absurd. Fakti për debatin e sotëm ishte sepse dy nga ekspertët nuk ishin prezent dhe do kishim dy procese paralele, duhet ti çonim atyre pyetjet me shkrim për të marrë përgjigjet dhe pjesa tjetër do përgjigjej me gojë. Pra për të pasur një proces korrekt u la që ti përcillen pyetjet me shkrim. Edhe pse ne kërkuam që debati të behej drejtpërdrejt, sepse ata janë ekspertë dhe kanë dijeni mbi ate se cfarë kanë shkruar. Por në këto rrethana u gjykua që ishte korrekte për të pasur një përgjigje nga të gjithë ekspertët sesa të kemi dy procese paralele”, u shpreh Mediu.
Ish-ministri është akuzuar për “Shpërdorim të detyrës” lidhur me shpërthimin tragjik të ndodhur më 15 mars 2008 në fshatin Gërdec, ku humbën jetën 26 persona.
