Në Gjykatën e Posaçme Kundër Korrupsionit dhe Krimit të Organizuar u zhvillua këtë të mërkurë një tjetër seancë për dosjen “Gërdeci”, ku ish-ministri i Mbrojtjes, Fatmir Mediu, përballet me akuzat për shpërdorim detyre dhe shkelje të procedurave në ngritjen e fabrikës së demontimit të armëve.
Gjatë seancës, Mediu hodhi poshtë akt-ekspertizën e paraqitur nga grupi i ekspertëve, duke e konsideruar të pabazuar dhe në kundërshtim me realitetin ligjor dhe praktikën ushtarake të kohës.
“Është në kundërshtim me Kushtetutën që një ministri civil t’i kërkohet të njohë kalibrat. Nuk ekziston asnjë akt ligjor që ndan kalibrat e mëdhenj nga ata të vegjël. Në Ministrinë e Mbrojtjes ekziston praktikë e qartë, e përcaktuar me urdhër të shefit të Shtabit të Përgjithshëm dhe në bashkëpunim me kompani ndërkombëtare të vendeve anëtare të NATO-s, ku kalibrat nga 20 deri në 160 milimetra cilësohen si të vegjël,” argumentoi Mediu.
Përtej çështjeve teknike, ish-ministri theksoi para mediave rëndësinë e dëshmive të ish-zyrtarëve dhe ekspertëve amerikanë të kohës, të cilët sipas tij, kanë asistuar Shqipërinë në proceset e demontimit të armëve pas anëtarësimit në NATO.
Ai bëri me dije se gjashtë kongresmenë amerikanë kanë dërguar një letër drejtuar Ministrisë së Drejtësisë, duke kërkuar që dëshmitë e këtyre personazheve të merren parasysh.
“Në listën tonë të dëshmitarëve janë përfshirë ushtarakë të lartë amerikanë, përfshirë komandantin suprem të NATO-s në atë kohë dhe dy ekipe amerikane që kanë asistuar në çdo hap. Për ta kuptuar procesin, duhet të dihet se çfarë detyrash ka ministri – ai nuk ushtron detyra ushtarake,” u shpreh Mediu.
Seanca e radhës për këtë çështje është caktuar të mbahet më 24 qershor. Procesi për shpërthimin tragjik të 15 marsit 2008 në Gërdec, ku humbën jetën 26 persona dhe qindra të tjerë u plagosën, vijon të tërheqë vëmendjen publike edhe pas 16 vitesh.
