Sot në orën 10:30 pritet të zhvillohet në Gjykatën e Posaçme kundër Korrupsionit dhe Krimit të Organizuar seanca e radhës për çështjen “Partizani”.
Në këtë proces janë të përfshirë ish-kryeministri Sali Berisha, dhëndri i tij Jamarbër Malltezi, si dhe disa persona të tjerë.
Berisha akuzohet për “korrupsion pasiv të funksionarëve të lartë shtetërorë ose të zgjedhur vendorë”, ndërsa ndaj Malltezit rëndojnë dy akuza: “korrupsion pasiv” dhe “pastrim i produkteve të veprës penale ose veprimtarisë kriminale”.
Pjesë e dosjes është edhe biznesmeni Fatmir Bektashi, i cili përballet me akuzën për “korrupsion aktiv ndaj funksionarëve të lartë shtetërorë”. Ndërkohë, Xhimi Begeja dhe Andia Pustina akuzohen për “pastrim parash”.
Më 7 korrik 2025, GJKKO vendosi lirimin e Jamarbër Malltezit nga masa e arrestit shtëpiak, pas rreth 20 muajsh në izolim. Gjykata e zëvendësoi masën me një garanci pasurore prej 3 milionë lekësh.
