Tashmë që vendi po shkon drejt hapjes dhe numri i të shtruarve në spitale është i ulët, spitali “Shefqet Ndroqi” do rikthehet në normalitet për tu ofruar shërbime mjekësore pacientëve që vuajnë nga sëmundje kronike, që prej mëse 1 muaji janë transportuar në Elbasan.
News 24 raporton se duke filluar nga dita e hënë Sanatoriumi do rihapet, teksa sot 2 pacientët e vetëm që ndodhen në këtë spital do transferohen tek Spitali Infektiv.
“Spitali i Sanatoriumit do t’i rikthehet pacientëve të tij, pas më shumë se 40 ditësh. Po punohet prej ditës së djeshme për dezinfektimit të të gjitha ambienteve. Pritet transportimi me autoambulancë i të infektuarve me koronavirus tek Infektivi. Ditën e hënë do të rikthehet puna gradualisht në këtë spital”, tha gazetari Skëndaj.
Ditën e sotme, për të tretën ditë radhazi, numri i të prekurve ka qenë i lartë pasi në 24 orët e fundit janë regjistruar 17 raste të reja duke e çuar në 933 numrin total të të prekurve.
Rastet e reja janë kryesisht raste kontakti, ku 8 janë në Tiranë, 8 në Durrës dhe 1 në Krujë, teksa Ministria e Shëndetësisë informon se janë kryer 306 testime, 48 prej të cilëve kanë qenë personel shëndetësor.
Sipas Ministrisë së Shëndetësisë, në spitale situata paraqitet e qëndrueshme, pasi janë 9 pacientë të shtruar, teksa në terapi intensive janë 4 persona.
