Ditën e nesërme do të mbahet dhe samitit i Berlinit dhe sipas asaj që raportojnë mediat në Kosovë, samiti duket se nuk do të sjellë asnjë rezultat për liberalizimin e vizave.
Deri para tre javëve, Gjermania e kundërshtoi liberalizimin për shkak të mungesës së një konsensusi ndërmjet partive që e përbëjnë koalicionin e madh atje.
Në një analizë të siguruar nga lajmi.net thuhet se kundërshtimi më i madh i Gjermanisë ka qenë pikërisht në zyrën e kancelares Merkel dhe në Ministrinë e Brendshme.
“Qeveria gjermane ishte e ndarë në çështjen e liberalizimit të vizave për Kosovën. Derisa Ministria e Jashtme ishte në favor të liberalizimit të vizave, zyra e kancelares ishte skeptike bashkë me Ministrinë e Punëve të Brendshme,” – thuhet në analizë.
Mirëpo ky qëndrim gjerman tashmë ka ndryshuar tërësisht, sepse kundërshtimi i tyre ishte i ndërlidhur drejtpërdrejt me zgjedhjet që ishin mbajtur në disa ‘Lande’ të rëndësishme në Gjermani, të cilat shërbenin si barometër për zgjedhjet nacionale.
Mirëpo, Franca është shteti që tani është duke kundërshtuar ashpër liberalizimin e vizave.
Vetë Presidenti i Francës, Emmanuel Macron, në një fjalim gjatë ditës së enjte, ka thënë se projekti i ‘Zonës Shengen’ nuk po funksionon më.
Tema e emigrantëve ka qenë një temë e nxehtë në politikën franceze, gjë që është shfrytëzuar në maksimum nga partitë e ekstremit të djathtë. Macron, po ashtu, ka thënë se ky projekt ka sjellë një frymë të ndjenjës së padrejtësisë në popullin francez, të cilët janë ndjerë të tradhtuar nga vendet tjera të Zonës Shengen.
