Kanë kaluar 4 ditë nga tragjedia në Shkodër ku dyshohet se 39-vjeçarja u hodh në lumin Buna bashkë me tre fëmijët e saj, ku gjetën vdekjen, mirëpo ende nuk ka një pistë të qartë nga ana e grupit të hetuesve që mund të çojë në zbardhjen e plotë të krimit të rëndë. (lexo këtu)
I dyshuar kryesor është bashkëshorti i viktimës dhe babai i tre fëmijëve, Ergys Arazi i cili ka dëshmuar se në momentin e tragjeidsë ai ishte në një dyqan celularësh. Mirëpo siç bën me dije edhe gazetarja Anila Hoxha e ftuar në Top Story në TCH, këtë gjë do ta vërtetojnë qelizat e telefonit, përmes së cilave do të tregohet sesa afër ka qenë Arazi me bashkëshorten e tij para se të vendoste për fundin fatal. Hoxha tha se pritet përgjigje nga kompanitë celulare nëse është e vërtetë dëshmia e Erdys Arazit.
“Të ndjerët kishin një qese, kishin çokollatë, patatina, shtegu i fundit, momenti i fundit i tyre, çështja është regjistruar për shkaktim vetëvrasjeje, akuzën e vrasjes ndaj tre fëmijëve, e dyshuara kryesore ka humbur jetën dhe çështja nuk mund të vijohet. Zyrtare është që i vetmi dyshim që grupi hetimor ka që gruaja u shty drejt vetëvrasjes prej dhunës psikologjike, një e dhënë kuptimplotë është që është kërkuar provë në qelizat e telefonit një nga alibitë nëse ka qenë rreth perimetrit bashkëshorti duke qenë në urën e Bunës, në dëshminë e tij tha se isha në dyqanin e celularëve, që është larg vendit të ngjarjes, tregon vendndodhjen, për të provuar shkencërisht duhet përgjigje nga kompanitë celulare”, tha ajo.
Tragjedia e 2 Majit
Ngjarja e rëndë ka ndodhur më 2 maj. Alma Arazi dyshohet se u vetëvra duke u hedhur në lumin Buna, bashkë me 3 fëmijët e saj të mitur, 2 vajza dhe 1 djalë. I dyshuar kryesor për krimin e rëndë është bashkëshorti i Alma Arazit, Ergys Arazi, babai i tre fëmijëve. Ai akuzohet se ka ushtruar dhunë në familje, gjë që ka shtyrë 39-vjeçaren drejt aktit të vetëflijimit. Ndërkohë që sherri në familje kishte nisur prej kohësh, pasi Alma Arazi zbuloi tradhtinë e bashkëshortit.
Deri më tani, 31-vjeçari ka mohuar të gjitha akuzat duke u mbrojtur me pretendimin se e shoqja vuante nga probleme të shëndetit mendor. Familjarët pretendojnë se Arazi kishte një lidhje tjetër jashtëmartesore, detaj që është marrë si pistë hetimi nga autoritetet.
