Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim në Gjykatën e Posaçme të Shkallës së Parë 8 të pandehur të përfshirë në një skemë korruptive për përfitimin e banesave sociale në Durrës.
• Gezim Sylaj, akuzohet për “Ushtrim të ndikimit të paligjshëm ndaj personave që ushtrojnë funksione publike” në disa episode, si dhe për “Prodhim dhe mbajtje pa leje të armëve të gjuetisë dhe sportive”.
• Vasil Karasaliu, Viola Mema, Behare Luzi dhe Enxhi Çelaj, akuzohen për “Ushtrim të ndikimit të paligjshëm ndaj personave që ushtrojnë funksione publike” në bashkëpunim.
• Gazmend Panxha, Shyqyri Dema dhe Tahir Sylaj, akuzohen për dhënie dhe premtim të shumave monetare ndaj të pandehurve për përfitimin e paligjshëm të banesave sociale.
Të pandehurit prezantoheshin si punonjës me ndikim në administratën shtetërore, duke premtuar banesa sociale në zonën e Spitallës, Durrës, kundrejt shumave që varionin nga 5,000 deri në 15,000 euro.
Ata garantonin fitimin e banesave përmes ndërhyrjeve në proceset publike dhe dokumentacionit të nevojshëm.
Në katër raste, përfshirë një agjent të infiltruar, të pandehurit kanë kërkuar dhe marrë shuma parash nga qytetarët e interesuar për banesa sociale, duke i mashtruar me premtime për shpallje fituese dhe hyrje në banesë pas disa muajsh.
SPAK ka ngritur akuzat për “Ushtrim i ndikimit të paligjshëm ndaj personave që ushtrojnë funksione publike” dhe kërkon ndjekje penale për të gjithë të pandehurit, duke e cilësuar veprimin e tyre si një shkelje të rëndë të ligjit.
