Deputetja Rudina Hajdari nuk ka pranuar të votojë Aktin Normativ për miratimin e marrëveshjes sekrete të qeverisë shqiptare me kompaninë Pfizer, e cila prodhon vaksinën kundër koronavirusit.
Sipas saj, gjithçka duhet të bëhet transparente edhe për qytetarët, pasi ata duhet të dinë se si merren këto vaksina.
“Nuk jam informuar në lidhje me këtë takim që keni bërë dhe diskutimit që keni bërë dhe nuk jam dakord me mënyrën e procedimit sepse është një çështje tejet sensitive dhe duhet të jemi sa më transparentë me qytetarët dhe aktet normative nuk kanë pse të kalojnë sot. Në mund të mblidhemi në një seancë tjetër dhe të njihemi me këto akte. Nuk kemi pse sillemi sikur ka ndonjë sekret të madh. Duhet të jemi transparentë se si merren këto vaksina dhe qytetarët të jenë në dijeni”, tha Hajdari.
Qeveria ka dërguar në Kuvend aktin normativ me tekstin e marrëveshjes sekrete me kompaninë Pfizer Export BV për blerjen e një sasie të vaksinës kundër COVID-19. Me kërkesë të kompanisë, marrëveshja do të mbahet e fshehtë, duke përfshirë të gjitha elementet si çmimi, sasia, afatet e dorëzimit, transporti, hyrja në Shqipëri, administrimi etj. Gjithashtu, të gjitha institucionet e përfshira në dhënien e mendimit, të miratimit apo janë pjesë e procesit kanë detyrimin të mos bëjnë publike marrëveshjen bashkëlidhur aktit normativ.
Për rrjedhojë, marrëveshja nuk është publikuar në faqen Kuvendit siç ndodh me marrëveshjet e zakonshme. Po si do të miratohet marrëveshja në Kuvend?! Marrëveshja do shqyrtohet fillimisht nga komisionet parlamentare përkatëse, përfshirë edhe Komisionin për Punën, Çështjet Sociale dhe Shëndetësinë. Mbledhjet e komisioneve do të zhvillohen online, por nuk do të bëhet publike. Gjithashtu, nuk do të botohen as procesverbalet e diskutimeve. Deputetët do të njihen me përmbajtjen e marrëveshjes, po nuk do të kenë të kopje të saj dhe as mundësi për ta fotografuar.
/Gazetareforma.com/
