Deputetja demokrate Rudina Hajdari në të njëjtën kohë edhe bashkëkryetare e Komisionit për Reformën Zgjedhore ka braktisur pas dy orësh tryezën e diskutimit.
Në deklaratën që ajo dha pasi mbaroi diskutimin Hajdari u shpreh se palët po diskutonin për tenderin e indetifikimit biometrik dhe jo për gjëra të rëndësishme për qytetarët.
Kjo gjë sipas saj humbet besimin që qytetarët kanë në reformën zgjedhore dhe ndryshimet që ajo do të sjellë.
Ajo tha se do të vazhdojë në Kuvend betejën për ndryshimin e sistemit dhe shtoi se nuk do të kthehet më në atë tryezë për ndarjen e tenderave.
“Mbledhja nuk ka përfunduar akoma por kemi gati dy orë që shpenzojmë për tenderin e identifikimit biometrik. Nuk kam ardhur të merrem me tendera por për të përfaqësuar atë frymë për të ndryshuar sistemin zgjedhor. Është e pamunduar për të folur këtu për këtë gjë. Është e trishtë të ulen dhe të flasin për gjëra që nuk kanë rëndësi. Unë u largova nga ky takim dhe për të shpenzuar kohën time me qytetarët dhe jo me Këshillin Politik që diaskuton gjëra të parëndësishme. Nuk mund të vazhdojmë të flasim për gjëra që skanë rëndësi për qytetarët. Nëse do vazhdojmë me këtë metodë, po i mbylim derën cdo njeriu që ka besim në reformën zgjedhore“, tha Hajdari.
