Kuvendi është përfshirë nga debate të ashpra gjatë ditës së sotme, për shkak të ndryshimeve që pritet të votohen, përsa i përket situatës së krijuar nga COVID-19.
Deputetja Rudina Hajdari nga foltorja e Kuvendit, është shprehur se shqiptarët sot janë më shumë vetëm sesa kurrë, në ndryshim nga ajo që thotë kryeministri.
Sipas saj, familjet që mbahen me një dyqan, janë të detyruar që të paguajnë të gjitha taksat, ndërsa kreditë nuk po shtyhen, pasi bankat nuk duan t’ja dinë çfarë thotë Rama.
Më tej Hajdari shtoi, se shumë familje sot nuk kanë mundësi të ushqehen, ndërsa u është ndërprerë edhe energjia elektrike.
Deputetja vijoi duke thënë, se asgjë nuk i kushtonte qeverisë që të zeronte faturën e energjisë elektrike për familjet në nevojë.
Ndër të tjera Hajdari u shpreh, se kryeministri kërcënon shqiptarët me burg, kur ndërkohë duhet t’u jepte çdo personi mbi 18 vjeç një çek, siç ka bërë Maqedonia e Veriut dhe Kosova.
“Të rritet mbështetja financiare për ata që janë në vijën e parë të luftës. Një krizë e kësaj natyre të bën të reflektosh për shumë gjera në jetë. Duam apo s’duam ne, sytë i kthejmë nga udhëheqja për t’u orientuar në këtë krizë. Vendi është zhutyr në krizë. Rama thotë që ti nuk do jesh kurrë vetëm, por ne jemi më vetën se kurrë. Një familje, bijtë e tyre janë jashtë për të punuar në punë sezonale, thote se ata janë në mes të katër rrugëve. Edhe ato familje që kanë një dyqan në lagje, duhet të paguajnë të gjitha taksat, ata janë braktisur nga qeveria. Po ashtu edhe kreditë nuk p0 shtyhen, se bankat nuk duan tja dinë se çfarë po thotë Rama. Ka dhjetëra dhe mijëra familje që sot ndohen në nevojë dhe nuk kanë mundësi të ushqehen dhe u kanë hequr edhe dritat. Asnjë gjë nuk i kushton qeverisë që të zeronte faturën e energjisë elektrike për familjet në nevojë. Nuk duan tja dinë se janë në një realitet ndryshe. Qytetarët sot ndihen më shumë vetëm. Nëse do të kishin një realitet ndryshe, sot duhet të ishte shpërndarë një çek për çdo qytetar mbi 18 vjeç, ashtu siç bëhet në Kosovë dhe Maqedoni e Veriut. Një ndihmë e madhe duhet t’i jepet biznesit të vogël dhe atij të mesit. Ju thotë se do t’ju burgosë, ju kërcënon me burgosje dhe ky është turpi më i madh, Ndërkohë që e gjithë bota këshillon që qytetarëve sot duhet t’u jepet shpresë, ky kryeministër ka përdorur fjalën burg 674 herë, kjo është zgjidhja e vetme për çdo krizë për të. Ka ardhur koha që burgu të hapet, por jo për qytetarët, të luftojmë së bashku për të futur në burg pushtetarët që kanë abuzuar me pushtetin“, tha Hajdari.
