Kryetari i Kuvendit të Shqipërisë Gramoz Ruçi me anë të një letre ka uruar kryetarin e ri të Kuvendit të Maqedonisë së Veriut Talat Xhaferi me rastin e rizgjedhjes në detyrë.
Në letër Ruçi shkruan se rizgjedhja e tij është tregues i lidershipit të tij të sprovuar, të pjekurisë dhe emancipimit të elitës politike shqiptare në Maqedoninë e Veriut.
Gjithashtu Ruçi shprehet i bindur se shumë shpejt do të fillojë bashkëpunimi mes homologëve të dy vendeve teksa e fton Xhaferin për një vizitë në Tiranë.
Letra e plotë
“Me rastin e rizgjedhjes Kryetar i Kuvendit tëRepublikës së Maqedonisë së Veriut, ju dërgoj urimet më të mira të Kuvendit të Shqipërisë dhe të miat personale.
Rizgjedhja Juaj në këtë detyrë të lartë është një tregues i lidershipit tuaj të sprovuar, vizionar, të matur dhe të balancuar, gjatë katër viteve të legjislaturës së kaluar në Republikën e Maqedonisë së Veriut.
Rizgjedhja Juaj është gjithashtu një tregues i pjekurisë dhe emancipimit të elitës politike shqiptare në Maqedoninë e Veriut dhe i përgjegjësive të saj për konsolidimin e demokracisë, ndërtimin e një shoqërie të drejtë, zhvillimin ekonomik e shoqëror dhe përshpejtimin e proceseve integruese euro-atlantike të Maqedonisë së Veriut.
Shpreh bindjen se rritja dhe fuqizimi i përfaqësimit politik do t’í shërbejë përmirësimit të mirëqenies dhe nxitjes e zgjerimit të përfshirjes së shqiptarëve në të gjitha nivelet dhe institucionet e Republikës së Maqedonisë së Veriut.
Jam gjithashtu i bindur se bashkëpunimi shumë i suksesshëm midis Kuvendit të Republikës së Shqipërisë dhe Kuvendit të Republikës së Maqedonisë së Veriut do të rifillojë shumë shpejt dhe kam kënaqësinë t’ju ftoj për një vizitë zyrtare në Shqipëri, në një kohë sa më të afërt dhe në përputhje edhe me agjendën tuaj.”
