Rrugët dhe investimet për to edhe pse janë përqeshur dhe komentuar dikur nga Edi Rama, para se të ishte bërë kryeministër, duket se janë “asi” i tij nën mëngë për mandatin e tretë qeverisës.
Duke nisur që nga viti që vjen, projektbuxheti i vitit të ardhshëm, i cili ka nisur diskutimet në Kuvend, parashikon nivelin më të lartë historik të investimeve publike dhe sidomos në infrastrukturë.
Në këtë kuadër, fondet buxhetore për vitin 2021 janë orientuar tek infrastruktura, e cila ka marrë edhe rritjen më të madhe në krahasim me ministritë e tjera.
Por, pavarësisht kësaj, Financat kanë miratuar vetëm 45% të fondeve të kërkuara nga ky dikaster.
Më shumë financime për vijimësinë e projekteve infrastrukturore të nisura. Është kjo kërkesa e ministres së Infrastrukturës, Belinda Balluku, për Financat sipas të cilës, rritja e fondeve do të shmangte krijimin e detyrimeve të prapambetura.
Më konkretisht, ka kërkuar një shtesë fondi të konsiderueshëm prej 10 miliardë lekë për transportin rrugor, kryesisht për ndërtimin e rrugëve.
Po ashtu Balluku ka kërkuar edhe 200 milionë lekë më shumë për transformimin e porteve detare, si dhe një shtesë prej 2 miliardë lekësh për sistemin e kanalizimeve si dhe një rishikim të buxhetit për Agjencinë e Eficiencës së Energjisë.
“Ne kemi kërkuar 60.5 miliardë lekë dhe na është miratuar vetëm 45%. Disa projekte mund të vihen në rrezik, por ne do të mundohemi ti shpenzojmë në mënyrë eficente.
Në transportin rrugor ne kërkojmë që shpenzimet korrente të rriten me 2 miliardë lekë, një rritje prej 8 miliardë lekë për projektet ekzistuese për të mos krijuar detyrime të prapambetura.
Kërkojmë 200 milionë lekë shtesë për projektet e transportit detar. Transporti hekurudhor është buxhetuar 1.2 miliardë lekë, këtu nuk kemi ankesa. Agjencia e Eficiencës së Energjisë ka nevojë për rishikim të buxheti”,- ka deklaruar Belinda Balluku.
Ministrja Balluku ka njoftuar hapjen garës ndërkombëtare më 15 Nëntor për ndërtimin e një impianti diellor në Spitallë me një kapacitet të instaluar prej 100 MË.
Ndërsa është ndalur te rruga Fushë-Krujë-Krujë, Balluku ka deklaruar se po shikohet mundësia e përfshirjes së saj në koncesionin e aksit Milot – Fier, për të cilën ministria ka vendosur një shtyrje të afatit të dorëzimit të ofertave më 9 Nëntor, nga 28 Tetori që ishte planifikuar më herët.
/GazetaReforma.com/
