Gjatë ditës së djeshme u zbulua një skandal i madh në Shqipëri pasi të dhënat personale të 637 mijë qytetarëve dhe pagat e tyre u publikuan në rrjetet sociale dhe Whatsapp.
Lajmi bëri jehonë edhe në mediat e huaja, teksa në reagimin e tij për këtë skandal, Edi Rama u shpreh se si kjo ngjarje ndodh kudo edhe në vendet e tjera të botës, teksa apeloi që autoritetet të hetojnë menjëherë rastin.
Sipas Ramës, e gjitha databaza me të dhënat, ka qenë e publikuar në Tik-Tok, para shumë muajsh, por nuk është përdorur, ndërsa po sipas kryeministrit, skandali ‘plasi’ pikërisht dje.
Rama u shpreh:
Ka edhe një element tjetër që kjo bazë ka dalë në Tik Tok para shumë muajsh. Por nuk është përdorur. Është përdorur tani. Pse përdoret tani. Dhe pse zëdhënës të non gratave paralajmërojnë të tjera. Kjo është dorë në kërkim të konfuzionit dhe destabilizimit në sensin e pasigurisë publike. Nuk ka asnjë mundësi tjetër. Mbase këtë gjë e ka nxitur që ne për disa javë me radhë kemi ndërmarrë një tur sensibilizim që do mbyllen sportelet. Por ne do ta bëjmë këtë gjë. Nuk do na pengojnë këta që hedhin gurin dhe fshehin dorën. Nuk duan të përfitojnë ata që menjëherë e asociojnë kriminelin me qeverinë. Ky është një rast domethënës deri ku mund të shkojnë njerëz dhe forca të caktuar kundër qytetarëve për qëllimet e tyre.
Ndërkohë vetëm një ditë pas skandalit së rrjedhjes së të dhënave personale të më shumë se 630 mijë qytetarëve, është publikuar edhe lista me pagat e muajit prill. Lista është në të njëjtat parametra atë të parën, e eksportuar në programin “Exel”. Ajo përmban të dhëna mjaft personale si numri ID, Nipt-i i biznesit, emër mbiemër dhe paga.
