Dhuna në familje dhe abuzimet ndaj të miturve po marrin përmasa shqetësuese në qarkun e Fierit.
Vetëm gjatë muajit të fundit, policia lokale ka referuar mbi 18 raste në Prokurori, shumica e të cilave lidhen me dhunë ndaj grave dhe fëmijëve.
Sipas psikologes Lumturi Vruho nga Qendra “Horizont”, shkaqet janë të shumëfishta: prindërimi i gabuar, kushtet e vështira ekonomike, mungesa e edukimit emocional dhe një histori problematike brenda vetë familjeve.
Ajo thekson se dhuna ndaj fëmijëve nuk është më një fenomen i rrallë, por po kthehet në përditshmëri shqetësuese.
“Prindërit shpesh humbasin lidhjen emocionale me fëmijët, për shkak të izolimit, krizave sociale dhe përdorimit të tepërt të teknologjisë. Këto faktorë nxisin mungesën e komunikimit dhe krijojnë terren për tensione e konflikte”, thotë psikologia.
Një tjetër dimension i errët është dhuna në çift, ku mungesa e komunikimit dhe problemet e pashprehura shndërrohen në burime të vazhdueshme përplasjesh.
Megjithatë, Vruho nënvizon se ka një rritje të ndërgjegjësimit: “Gjithnjë e më shumë çifte kërkojnë ndihmë profesionale. Psikologu nuk shihet më si tabu. Edhe kur vetëm njëri nga partnerët tregon vullnet për ndryshim, mund të sjellë përmirësim në marrëdhënien familjare.”
Ekspertët bëjnë thirrje që dhuna të mos tolerohet. Gratë dhe partnerët që përballen me abuzim apo tensione duhet të kërkojnë ndihmë, qoftë nga psikologët apo institucionet përkatëse.
Ndërhyrja në kohë, sipas tyre, mund të shmangë përshkallëzimin e situatave dhe të ruajë si sigurinë, ashtu edhe shëndetin mendor të familjes.
