Human metapneumovirus (HMPV) është një infeksion respirator që shkakton simptoma të ngjashme me gripin ose të ftohtin, dhe mund të çojë në komplikime më serioze si bronkiti ose pneumonia, sidomos tek fëmijët e vegjël, të moshuarit dhe ata me sistem të dobësuar imunitar.
Ky virus është pjesë e të njëjtës familje me virusin respirator sincitial (RSV) dhe u identifikua për herë të parë në vitin 2001 në Holandë. Shpërthimet shpesh ndodhin gjatë dimrit.
Aktualisht, raste të rritura të HMPV janë raportuar në Kinën veriore, veçanërisht tek fëmijët, ndërkohë që autoritetet lokale kanë theksuar se infeksionet janë më të lehta dhe përhapen në shkallë më të vogël krahasuar me vitin e kaluar.
Rritja e rasteve është mundësuar pjesërisht nga teknologjitë më të përparuara për diagnozën e këtij virusi dhe një kujdes i shtuar në lidhje me shpërthimet, megjithëse ekspertët kanë theksuar se nuk ka arsye për frikë të një pandemie të ngjashme me Covid-19.
Simptomat e HMPV janë të ngjashme me ato të gripit dhe të ftohtit, por mund të shkaktojnë komplikime serioze te individët më të ndjeshëm. Për shumicën e njerëzve, infeksioni nuk është më i rrezikshëm se një ftohje e zakonshme.
Por për ata me kushte të dobësuara shëndetësore, mund të jetë më i rrezikshëm. Aktualmente, nuk ka vaksina apo trajtime antivirale për HMPV, por disa janë në zhvillim.
Ekspertët këshillojnë marrjen e masave parandaluese të ngjashme me ato të përdorura gjatë pandemisë së Covid-19, si higjiena e duarve, mbajtja e maskave në vende publike dhe shmangia e kontaktit me të tjerët kur janë të sëmurë.
Kjo mund të ndihmojë në uljen e përhapjes së virusit dhe mbrojtjen e grupeve më të rrezikuara.
