Ministrja e Shëndetësisë dhe Mbrojtjes Sociale, Ogerta Manastirliu ka lajmëruar se muaji shtator do të jetë muaj i hapur për vaksinimin masiv të popullsisë. Ky vendim është marrë nisur nga situata me pandeminë në vendin tonë, e cila në javët e fundit ka pasur një rritje të ndjeshme të infektimeve për shkak kjo edhe të variantit të ri “Delta”. Manastirliu me anë të një postimi në rrjetet sociale ka thënë se shtatori do të jetë muaji i hapur i vaksinimit dhe të gjithë personat që janë mbi 18-vjeç mund të vaksinohen fare lehtë vetëm duke u paraqitur nqë qendrën më të afërt të vaksinimit me një mjet identifikimi. Manastirliu ka thënë se vaksinimi i hapur po bëhet për të mbrojtur jetën e qytetarëve dhe shëndetin e tyre, por edhe për të garantuar mbarëvajtjen e vitit të ri shkollor, të aktiviteteve të biznesit dhe të jetës së përditshme.
“Muaji Shtator do të jetë muaj i hapur i vaksinimit masiv për qytetarët mbi 18 vjeç, për të mbrojtur jetën dhe shëndetin, për të garantuar mbarëvajtjen e vitit të ri shkollor, të aktiviteteve të biznesit dhe jetës së përditshme.
Apeli i Ministres Ogerta Manastirliu dhe plani për përballimin e valës së koronavirusit gjatë vjeshtë-dimrit”, thuhet në njoftim.
Manastirliu tha se të dhënat epidemiologjike të dy javëve të fundit tregojnë një rritje me rreth 5 herë të rasteve të infektimeve krahasuar me periudhën e mëparshme.
“Në Spitalin Infektiv ndodhen të shtruar 84 pacientë. Ka prej tyre janë në gjendje më të rëndë dhe po trajtohen në terapi intensive. E përbashkëta e shumicës së pacientëve që këto ditë gushti, që po vuajnë dhe format më të rënda të sëmundjes, është se nuk janë të vaksinuar. Mjekët që shërbejnë me përkushtim në Spitalin Infektiv raportojnë se përgjatë kësaj periudhe ka patur edhe disa raste të të shtruarve të cilët kanë qenë të vaksinuar, por shprehen optimistë për gjendjen shëndetësore të pjesës dërrmuese të pacientëve që janë vaksinuar dhe e kanë përgatitur organizmin, për përballjen me virusin”, tha Manastirliu.
