Ministrja e Shëndetësisë dhe Mbrojtjes Sociale, Ogerta Manastirliu ka reaguar lidhur me hapjen e spitalit COVID-3 në vendin tonë.
Manastirliu me anë të një postimi në rrjetet sociale tregon se është riaktivizuar plani për përballimin e situatës për t’iu përgjigjur fluksit në spitale, për shkak edhe të rritjes së numrit të rasteve ditore në Shqipëri.
Ndër të tjera ministrja ka theksuar se synimi tashmë është frenimi i përhapjes së pandemisë në vend dhe për të lehtësuar pasojat.
Po ashtu ajo ka theksuar edhe një herë që thelbësore për parandalimin e pandemisë mbetet, vaksinimi masiv. Sjellim në vëmendje se Ministria e Shëndetësisë bëri me dije se edhe muaji shtator do të jetë muaji i hapur për vaksinimin masiv të personave mbi 18 vjeç, të cilët mund të paraqiten në qendrën më të afërt të vaksinimit vetëm me një mjet identifikimi.
Statusi nga Ogerta Manastirliu
Forca ekipit të Spitalit #Covid3 në shërbim në këto momente, i hapur për të përballuar shtimin e rasteve të qytetarëve të prekur nga #Covid19, që kanë nevojë për trajtim spitalor.
Kemi riaktivizuar planin e përballimit të situatës, për t’iu përgjigjur fluksit në spitale, me përforcimin e ekipeve mjekësore, sigurimin e barnave dhe materialeve mjekësore dhe aparaturat jetëshpëtuese, por është thelbësor vaksinimi masiv, për të frenuar përhapjen e epidemisë në vend dhe lehtësuar pasojat e saj.
#MbroJetën #VaksinohuSot
