Monopatinat elektrike po shndërrohen në një prej burimeve kryesore të aksidenteve rrugore në Shqipëri, ndërkohë që shteti nuk ka ende një kuadër ligjor që të rregullojë përdorimin e tyre.
Të dhënat nga Spitali Universitar i Traumës tregojnë një situatë alarmante: vetëm gjatë vitit 2024 janë trajtuar 694 persona të lënduar nga aksidente me monopatina, ndërsa në 5 muajt e parë të vitit 2025 janë regjistruar 212 raste të tjera.
Shumica e të dëmtuarve janë të rinj nga mosha 15 deri në 30 vjeç, por nuk mungojnë as rastet e fëmijëve apo të moshuarve që përfshihen në përplasje, si drejtues të monopatinave apo kalimtarë të rastësishëm.
Sipas mjekëve, dëmtimet shpesh janë serioze, nga fraktura në kokë dhe shtyllë kurrizore deri në dëmtime të rënda të gjymtyrëve dhe organeve të brendshme. Megjithatë, përdorimi i këtyre mjeteve vazhdon në mënyrë të pakontrolluar.
Në Shqipëri nuk ekziston një ligj specifik që të përcaktojë moshën minimale për përdoruesit, zonat e lejuara për qarkullim apo kufirin e shpejtësisë. Ato trajtohen në mënyrë të përgjithshme si biçikleta, edhe pse dallimet teknike dhe rreziku janë shumë më të mëdha.
Pamjet nga rrugët e Tiranës dhe qyteteve të tjera tregojnë një realitet të rrezikshëm: përdorues pa helmetë, shpeshherë nga dy veta në një monopatinë, që lëvizin me shpejtësi të lartë, pa sinjalistikë ndriçuese dhe në infrastrukturë të papërshtatshme. Trotuaret dhe korsitë e biçikletave janë të ngushta ose inekzistente, duke e rritur rrezikun për përplasje me këmbësorë apo mjete të tjera.
Në kushtet kur aksidentet shtohen, ndërsa rregullat mungojnë, Shqipëria përballet me nevojën urgjente për të ndërhyrë me masa konkrete ligjore dhe infrastrukturore, përpara se kjo situatë të bëhet e pakontrollueshme.
