Numri i viktimave nga sulmet ajrore ruse në Ukrainë është rritur në 12 të vdekur dhe 90 të plagosur, pas goditjes me raketa dhe dronë të qytetit të Kievit.
Sipas një njoftimi të publikuar nga qendra e urgjencës ukrainase në platformën Telegram, “Numri i të vdekurve në rrethin Sviatoshinsky të Kievit ka arritur në 12. Ekipit e shpëtimit nxorrën dy trupa të tjerë nga rrënojat”. Në të njëjtin komunikim, autoritetet konfirmuan gjithashtu se “90 persona u plagosën”.
Pamjet e shpërndara në rrjetet sociale tregojnë ekipet e emergjencës duke kërkuar me drita dore për të mbijetuarit, ndërsa vendosin shkallë në fasadat e godinave të dëmtuara. Policia ka kontrolluar një nga një apartamentet e ndërtesës për të identifikuar viktimat ose për të ndihmuar ndonjë person të bllokuar.
Sulmi shkaktoi dëme edhe në rajonin perëndimor të Zhytomyr-it, ku forcat ruse qëlluan një ekip shpëtimi që po përpiqej të shuante një zjarr. Nga ky incident mbeti i plagosur një pjesëtar i ekipit.
Kievi vijon të jetë një nga objektivat kryesore të sulmeve të përsëritura ajrore ruse, që kanë lënë pas dhjetëra të vdekur dhe të plagosur gjatë muajve të fundit.
