Janë bërë 28 ndryshime në Kodin Rrugor, ku mes tyre janë gjoba dhe konfiskim të mjeteve të blinduara për drejtuesit që nuk kanë autorizim, si dhe shumëfishim i gjobave për përdorimin e celularit, ndërkohë që je duke drejtuar mjetin.
Sipas rregullave të reja që kanë kaluar për diskutim në Kuvend, kushdo që qarkullon me mjetet të blinduara pa leje do të gjobitet nga 100 mijë -200 mijë si dhe do i konfiskohet mjeti.
Gjithashtu do të ketë ashpërsim të gjobave dhe masave për kalimin kundravajtje dhe moszbatim të përparësisë në kryqëzim, me 5 mijë deri në 10 mijë lejë dhe për rastet që janë kundravajtje u pezullohet edhe patenta me 3 muaj dhe u hiqen 5 pikë nga ajo.
Kush nuk përdor rripat e sigurisë dhe sistemet e fiksimit, ndëshkohet me masë administrative me gjobë, nga 5 mijë deri në 15 mijë lekë. Drejtuesi i mjetit ndëshkohet me masë administrative me gjobë, nga 1 mijë deri në 3 mijë lekë, nëse konstatohet se në mjetin që ai drejton ka pasagjerë që nuk kanë vendosur rripin e sigurimit.
Sa i përket përdorimit të telefonit gjatë drejtimit të mjetit, fjalët “nga 500 deri në 1500 lekë” zëvendësohen me fjalët “nga 5 mijë deri në 15 mijë lekë” gjobë. Në raste të përsëritjes së shkeljes së mësipërme 3 herë brenda të njëjtit vit, drejtuesit të mjetit i pezullohet leja e drejtimit 3 muaj dhe i hiqen 10 pikë.
Kush humbet të 20 pikët nga patenta si pasojë e shkeljes së rregullave të qarkullimit rrugor, shoferi i kthehet autoshkollës për një kurs një javor dhe në fund jep provimin për marrjen sërish të patentës.
“Me humbjen totale të pikëve, mbajtësi i lejedrejtimit ndjek një kurs një javor pranë autoshkollave të licencuara. Në përfundim të këtij kursi, drejtuesi i mjetit i nënshtrohet provimit të kualifikimit teknik, sipas nenit 128 të këtij Kodi dhe akteve të tjera normative në fuqi”, thuhet në Kodin Rrugor të ndryshuar.
