Frekuentimi i plazheve dhe pishinave shpesh shoqërohet me dëshirën për zhytje dhe hedhje me kokë nga trampolinat apo nga lartësi të ndryshme në det të hapur.
Megjithatë, këto veprime janë shumë të rrezikshme, pasi dëmtimet që shkaktojnë mund të jenë nga më të lehtat deri te ato fatale.
“Nuk duhet të praktikohen sepse hedhja me kokë ka ato risqet që tek traumat e kokës por dhe tek traumat e qafës, pra të kolonës cervikale që mund të jenë me pasoja të parikuperueshme. Që nga humbja e jetës tek tetraplegjia, paralizimi nga qafa e poshtë,” shpjegon Ilir Hasmuça, mjek ortoped në Spitalin e Traumës.
Ai thekson se me fillimin e sezonit veror rritet numri i traumave nga këto aktivitete, si dhe ato që lidhen me sportet ujore, ndërsa të prekurit janë kryesisht të rinj apo adoleshentë.
Për këtë arsye, mjeku bën një apel të fortë: “Për një moment euforie, një moment adrenaline, një moment aventure mund të ndryshojë gjithë avenirin e jetës tënde, duke përjashtuar humbjen e jetës sepse çdo rast pa humbje jete por me dëmtime të cilat nesër kanë pasoja, qoftë fizike qoftë mendore duhet ta mendosh se nuk do jesh si më përpara.”
Në rast se ndodh një aksident, mjekët këshillojnë të tregohet shumë kujdes në mënyrën se si lëvizet pacienti sapo të nxirret nga uji dhe të kërkohet menjëherë ndihma profesionale emergjente.
